كتير من الناس بيعانو من رائحه الفم الكريهة او ال halitosis .
وفي ناس ريحه الفم عندهم طبيعيه بس فاكرين أنها كريهه ودا مجرد وهم مش اكتر وعلي العكس ناس تانيه بيكون رائحة الفم عندهم كريهه وفاكرين إن دا حاجه طبيعيه لأنهم ببساطه اتعودو عليها.
طب ازاي اعرف اذا كانت ريحه النفس عندي كريهه ؟؟
اسال صاحبك وهو علي بعد منك اذا كانت ريحه النفس كريهه ومتسالش اخوك او اي حد من قرايبك لأنهم اتعودو علي ريحه نفسك ومش هيعرفو إذا كانت دي ريحه كريهه أو لأ .
اسباب رائحه الفم الكريهة وطرق علاجها
1/ الاكل
لما بتاكل بصل أو ثوم او اي حاجه ريحتها نفاذه بتخلي ريحة الفم كريهه بس لازم ناخد بالنا ان دي ريحه موقته وكمان مش حاله مرضيه .
⬅️ وسهل نتغلب عليها بإستخدام مضمضه بعد الاكل او اكل لبان بطعم النعناع مثلا بس لازم يكون منزوع السكر عشان نمنع تسوس الأسنان ، أو ببساطه ممكن أننا نتجنب اكل الحجات اللي بتخلي ريحة النفس مش لطيفه.
2/ جفاف الفم
ودا سببه قله شرب الماء ، أو التنفس من الفم أثناء النوم ، أو تناول بعض الادويه زي ادويه " الضغط - الحساسية - المسكنات " ودي بتقلل اللعاب في الفم واللس بيغسل الفم وبيقتل بعض أنواع البكتيريا وبكدا بتتراكم البكتيريا في الفم ويخلي ريحه النفس كريهه .
⬅️ والحل أننا نشرب كميات كبيره من الماء ونمضغ اللبان منزوع السكر وشرب النعناع الدافئ والقرنفل وعرق السوس والرمان والمر وكل دي اعشاب طبيعيه بتخلي ريحة الفم جميله.
3/ مشاكل الفم والاسنان
ودي بتمثل 90% من اسباب رائحه الفم الكريهة ، والمشاكل دي زي ( إلتهاب اللثه - جير الأسنان -تسوس الاسنان - خراج الاسنان - استخدام أطقم الأسنان المختلفه - انتشار فطريات الفم زي الكانديدا ) .
⬅️ونقدر نتغلب علي المشاكل دي بغسل الاسنان بالفرشاة والمعجون أو السواك بعد كل وجبه أو علي الاقل مره واحده في اليوم قبل النوم وتستخدم الفرشاه المخصصه للتنظيف بين الأسنان interdental brushing أو خيط الأسنان عشان نمنع تراكم الاكل في جيب الاسنان وبالتالي نمنع تكون الجير وتراكم البكتيريا ، وكمان لازم نغسل اللسان بالفرشه الخاصه بيه tongue brusher
⬅️ ولو انت مريض ازمه وبتستخدم بخاخ الكورتيزون يفضل انك تستخدم مضمضه وتغسل الفم واللسان كويس بعد كل استخدام مباشرة .
⬅️ ولو بتستخدم طقم من أطقم الأسنان يفضل انك تغسله بعد كل وجبه أو مره واحده قبل النوم وتحطه في الصابون لصباح اليوم التالي مش تنام بيه .
⬅️ وفي حاله إذا كان عندك في الفم فطريات زي الكانديدا candida يفضل انك تتوجه للصيدلي أو الطبيب واللي ممكن يوصفلك بعض الادويه زي ال ( Diflocan - flocoral - fungican) ودي عباره عن اقراص والجرعه 2قرص وتاخد قرص كل اسبوع بس بعد تشخيص الطبيب طبعا ، وممكن يوصف جل للفم زي ( Daktarin Oral gel - Miconaz Oral gel) ودا عباره عن دهان 3 مرات في اليوم ومفيش اي ضرر لو تم ابتلاعه .
⬅️ وفي حاله وجود جير علي الاسنان أو تسوس أو خراج يبقا لازم تستشير طبيب الأسنان مباشره .
4/ التوتر والضغط النفسي والعصبي المستمر.
⬅️ لازم تكون هادئ و relax وحاول تركز علي التنفس السليم كل أما تحس بالتوتر او ممكن تمارس بعض تمارين اليوجا عشان تساعدك علي الاسترخاء.
5/ إلتهاب اللوز والجيوب الانفيه
⬅️ ويفضل انك تزور طبيب الأنف والاذن والحنجرة وتتابع معاه.
6/ التدخين .
التدخين بيخلي رائحة النفس كريهه جدا دا غير أنه بيسبب التهاب اللثه ويغير لون الأسنان وبيسبب الحموضه وغير تدمير الرئتين والأضرار الكتيره للجسم.
⬅️ والحل الوحيد هو الاقلاع عن التدخين وممكن يتم استبداله بلزق النيكوتين أو لبان النيكوتين وبنقلل الجرعه بالتدريج لغايه الاقلاع عنه نهائيا.
7/ الحموضه أو إرتجاع المرئ .
وفي الحاله دي حمض المعده بيخرج ويعدي في المرئ وممكن يوصل للفم ويسبب مشاكل الأسنان ويسبب رائحة الفم الكريهة .
⬅️ والحل أن المريض يتابع مع طبيب الباطنه ويستشير الصيدلي.
8/ الديدان .
وجود الديدان في الأمعاء بيسبب الرائحه الكريهه للفم وبنعرف أن الديدان موجوده من خلال تحليل البراز
⬅️ وعشان نعالج الديدان لازم نعرف نوعها ونعالجها بالعلاج المناسب تحت إشراف الطبيب.
9/ بعض الامراض المزمنه .
زي مرضي ( الكبد - الفشل الكلوي - مريض السكري )
⬅️ وفي الحاله دي المريض بيتابع مع طبيب الباطنه والكلي ويشوف العلاج المناسب وإذا كان في اي ضرر أو اثار جانبيه من الادويه اللي المريض بياخدها بالفعل .
يجب عليك تسجيل الدخول لتستطيع كتابة تعليق