أهم 10 نصائح للدفعة اللى داخلة ثانوية عامة

أهم 10 نصائح للدفعة اللى داخلة ثانوية عامة

بسم الله الرحمن الرحيم والصلاة والسلام على اشرف المرسلين سيدنا محمد وعلى اله وصحبه اجمعين..

هنتكلم عن شوية حاجات مهمه لازم تاخد بالك منها لو انت داخل ثانوية عامه والمفروض تلتزم بيها لو انت عايز تحقق نجاح فى الموضوع. 

1)أول حاجه تهتم بيها فى بداية السنه انك متبدأش السنه بشكل جدى وتاخد الامور على انها نهاية العالم وتقول هذاكر 10 ساعات فى اليوم .. لا خدها كأنها سنة عاديه جدا اهم حاجه تذاكر اللى بتاخده فى الدروس أول بأول ومتخليش حاجه تتراكم عليك .

2)تانى حاجه وهى انك تهتم بكل المواد متخليش ماده زى الفيزيا مثلا تاخد من وقت ماده زى الجيولوجيا واللى اغلب الناس بتركنها وتنصدم فى الاخر بيها لا اهتم بالكل بس برضو كل ماده حسب صعوبتها طب ودا هيتعمل ازاى ؟؟! بس على النقطة الجايه 

3)لازم تنظم نفسك وحاول تعمل جدول وتمشى عليه لان دا هيوفر عليك جدا وهيظبط معاك الوقت بشكل كويس وتخلى الجدول بقا منتظم ومناسب للمواد اللى عندك وقدرتك على المذاكره يعنى مثلا متعملش جدول تذاكر فيه 20 ساعه ف اليوم .. مثلا مثلا تعمل حسابك انك هتذاكر اربع مواد فى اليوم كل يوم يبقى تخلى مثلا الفيزيا اربع مرات ف الاسبوع والجيولوجيا 3 مرات وهكذا وتحاول تخلى يوم الجمعه للمراجعه وحل الأسئلة دا لو مكنتش بتحل طول الاسبوع يعنى. 

4)تزود كل فتره المده بتاعت المذاكره يعنى بدل ما كنت بتذاكر اربع مواد ف اليوم تخليها خمسه او تخلى نفس الاربع مواد بس تزود وقت كل ماده وتحاول تهتم شويه بقا انت دخلت ف الوقت الحرج. 

5)الحل ثم الحل ثم الحل .. مفيش طريقه تثبت بيها المعلومه احسن من انك تحل عليها ودا عن تجربة وحاجه معروفه. 

6) بأكد تانى على موضوع الحل😅

7)لازم بقا تهتم بنفسك مش تحبس نفسك للمذاكره وبس لا لازم تنام كويس وتاكل كمان كويس وتخرج وتظبط نفسك بس كل فتره مش كل يوم يعنى. 

8) حاول متشتريش اكتر من كتاب ف كل ماده هو كتاب واحد كفايه اوى وفى اخر السنه لما تنزل كتب الاسئلة بتاعت المراجعه النهائية اشترى كتاب واحد بس فى كل ماده دا كفاية اوى. 

9)نجى بقا لاهم فتره فى السنه وهى الفتره اللى تقريبا بتكون من نص شهر 3 او بداية شهر 4 كدا لحد بداية الامتحانات دى لازم تكون خلصت المناهج بقا فى المواد كلها لحد هنا وتبدأ بقا فى الفتره دى بمراجعات كتيره وحل اسئلة بأكد تانى على الحل بالذات ف الفتره دى 😄.  

10)فترة الامتحانات ودى لسه بدرى عليها ولكن بنقول من اولها مفيش توتر وسهر وتنام كويس دا كلو بيفرق جدا المهم لما تيجى الفتره دى نبقى نتكلم عنها.  

دول اهم 10 نصايح تحاول تنفذهم هينفعوك جداا لما تبدأ ثانوية عامه ان شاء الله وانا بنفسى كنت بعمل كدا انا بقولكم على اللى كنت بعملو بصراحه 😅 والحمدلله دلوقتى انا طالب فى كلية الطب البشرى عقبالكو كلكو ان شاء الله كل واحد يوصل للكلية اللى بيحلم بيها وبالتوفيق ان شاء الله ❤️.