تشارلز مانسون فتى الهيبز المجنون

تشارلز مانسون فتى الهيبز المجنون

- التاريخ ياما ورالنا وشوفنا فيه سفاحين كتير من المختلين عقليا ونفسيا وإزاي سيطرت عليهم وجهات نظر شاذة،وهواجس وأفكار فلسفية غريبة.وعلى الرغم من كده السفاحين بيشوفوا الأفكار دي منطقية وهما بيبرروا جرايمهم البشعة اللي خلت ليهم مكانة مرعبة في التراث الإنساني من الصعب نسيانها.

- واحد من السفاحين دول هو تشارلز مانسون إللي إسس عصابة "عائلة مانسون" في ستينات القرن الماضي وإتخذ من الولايات المتحدة الأمريكية مسرحا لجرايمه البشعة.

- العصابة دي إرتكبت حوالى تسع جرايم دموية خلال خمس أسابيع بس والكلام ده كان في صيف 1969....والجرايم دي كانت من أبشع الجرايم إللي شافتها الولايات المتحدة وقتها.

- وكانت أبشع جريمة هي جريمة قتل الممثلة الشابة "شارون تايت" زوجة المخرج الشهير جدا رومان بولانسكي إللي يعتبر فيلم بيانيست "pianist" واحد من أشهر أفلامه وأفلام السينما العالمية.

طفولته المظلمة:

-  إتولد تشارلز مانسون سنة 1934 في مدينة سينسياتي بولاية أوهايو الأمريكية،وكانت ولادته نتيجة علاقة غير شرعية بين الأم وألاب،كانت ساعتها أمه مكملتشي ستاشر سنة ومعروفه بطيشها وإنحرافها وميولها العدوانية،وكانت حريصة دايما انها تكون غايبة عن الوعي بتعاطيها المخدرات والخمور.

- طبعا تشارلز مترباش بشكل طبيعي لإنه عمره ما شاف أبوه وكمان بسبب تصرفات الأم إللي كانت ساعات تخليه يخدم في البارات مقابل جرعات الكحول الي بتشربها.

- اتقبض عليها بسبب محاولة سرقتها محطة بنزين وهي في حالة سكر تام،اتحبست وإتسلم مانسون لجدته عشان تربيه واللي مكانتشي مهتمة بيه برضوا وشايفاه عبئ عليها،الام طلعت من السجن وأخدت إبنها وكان عمره ساعتها 9 سنين بس واتنقلت بيه كتير من سكن لسكن وسرقة لسرقة تانية وتالتة،لحد ما الشرطة أدركت خطورة الأم على إبنها فأخدته منها وحطته في دار رعاية كاثوليكي،ولكنه مقعدتش الوقت الكافي لتقويم سلوكه فيه بالعكس دي ظهرت بوادر سلوكه المنحرف جواها وهرب من الدار بعد أقل من سنة.

تشارلز مانسون فتى الهيبز:

- سنة 1955 إتقبض على مانسون بسبب سرقته لسيارة وإتحكم عليه بالسجن خمس سنين....ولكنه إستفاد بعد كده بإطلاق سراح مشروط.

- حاول مانسون بعد كده ينظم حياته لدرجة إنه إتجوز من "روزالي ويليس" ولكنه رجع ووقع في الإنحراف من تاني...سرق عربية تانية وإتقبض عليه ودخل السجن.وأثناء وجوده ورا القضبان عرف إن مراته خلفت منه ولد لكنها طلبت الطلاق وأخدت الولد وسافرت.تم إطلاق سراحه بسبب حسن سلوكه جوة السجن لكن أول ما طلع إرتكب جريمة تانية ودخل السجن من تاني،لدرجة إن مانسون نفسه قال في مقابلة تلفزيونية معاه إنه كان شايف إن السجن هو بيته الأصلي.

- أصبح تشارلز مانسون الفتى المدلل في السجون الأمريكية وده بسبب إنه قعد فيها أكتر من عشرين سنة وده في ولايتين "أوهايو"و"فيرجينيا" وصنفته الشرطة ساعتها بإنه"رجل خطير" وحذروا من التعامل معاه.

- لما خرج مانسون من السجن كان فقد كل أساليب التواصل مع البشر والعالم الخارجي.وصنع عالم عجيب خاص بيه له فلسفته الغريبة.وبدأ في تكوين جماعته الخاصة عشان يطبق قواعد فلسفته على البشرية.

- إتعرف مانسون على بنت موظفة إسمها "ماري بونينج"واقنعها بأفكاره الغربية،وأقنعها كمان بإنه المسيح.طلب منها إنها تأسس معاه الجماعة،قدرت ماري تجمع 18 بنت عايشين على هامش المجتمع وفي العشوائيات وأجرت بيت وأسسوا"عائلة مانسون".

- كانت المخدرات عنصر مهم في تكوين الجماعة ده غير كمان إن مانسون خلف من كل بنت فى 18 طفل،وبقت عائلة مانسون رحالة بينتقلوا في كل مكان في وادي الموت وإنضم ليهم عدد من المشاهير.وزي ماقولنا إن مانسون إدعى إنه المسيح..وحاول يشعل حرب بين السود والبيض لإن 

كان في إعتقاده إن البيض حينتصروا وحينصبوه زعيم ليهم.

العملية الأولى للعائلة:

- قرر مانسون إن أول عملية هي السطو على بيت "جاري هينمان" لإنه كان فاكر إنه عنده مجوهرات وفلوس كتير.وبالفعل بعت تلاتة من جماعته لبيت هينمان واحتجزوه جوة البيت لتلاتة ايام،وهما بيدوروا على الفلوس والمجوهرات ولكنهم فشلوا في إنهم يلاقوا أي حاجة ليها قيمة،فقاموا بقتل هينمان بطعنه بسلاح حاد أكتر من طعنة وهربوا.

الجريمة الإشهر للعائلة:

- بعت مانسون أفراد عصابته عشان يقضوا على منتج أغاني مشهور رفض إنه ينتج ألبوم غنائي ليه ولعائلته ولكنهم إتفاجئوا بإنه أجر البيت لرومان بولانسكي المخرج السينيمائي المشهور لكنه مكانشي موجود بسبب وجوده في مهرجان سينما في أوروبا....قربت العصابة من البيت وعند السور قابلوا شاب سئ الحظ قتلوه وتسللوا جوة الفيلا.

- جوة الفيلا لقوا الممثلة"شارون تايت"زوجة رومان بولانسكي وكانت وقتها في الستة وعشرين من عمرها وحامل في الشهر التامن.نفذت الجريمة بنت إسمها"سوزان أتكينز"واحدة من أتباع مانسون.وكتبت بدم الممثلة عبارة"خنازير" على مدخل البيت عشان يفهموا البيض إنها جريمة عنصرية وإللي عمل الجريمة دي السود وتقوم حرب أهلية زي ما كان عاوز مانسون.لكن وقعت الجماعة في قبضة السلطات وإتقدمت للمحاكمة. 

- إتوصف مانسون ساعتها بإنه مجنون عنده قدرة كبيرة على الإقناع.وكان واضح إنه مكانشي ندمان على جرايمه قدام القضاة والغريب إنه نال شهرة واسعة وبقى ليه عشرات الالاف من المريدين والمؤيدين له وفلسفته في الولايات المتحدة واوروبا.

- إتحكم عليه في سنة 1971 بالإعدام مع اربعة من عائلته..وبعدين تم تخفيض الحكم للسجن مدى الحياة.وكان مانسون بيحضر جلسات محاكمته وهو على جبينه وشم لصليب معقوف هو وأتباعه.

- قنوات التلفزيون والصحافة عملت لقاءات كتير مع مانسون لدرجة إن واحد من اللقاءات دي أخد جايزة إيمي كأفضل لقاء تليفزيون في السنة دي.

- وفي واحد من المقابلات الصحفية إتسئل مانسون عن النصيحة اللي ممكن يقدمها للشباب فقالهم"إتركوا أثرا ليعرفوا إنكم كنتم هنا".

- وبعد أن قضى مانسون أكتر من 45 سنة فى السجن .مات سنة 2017 بسكتة قلبية ناتجة عن مضاعفات سرطان القولون.