جروح مرضي السكر
اوعي تتعور !!!
كلمه بنسمعها كتير بتتقال لمريض السكر
طيب سألنا نفسنا بنقول كده ليه ولا احنا لقينا الناس بتقول كده فبنقول زيهم وخلاص ؟!!!
تعالي معايا وانا اقولك ليه بنقول كدا .
⬅️ السبب الأول هو أن الدم مبيوصلش بكميه كافيه لاجزاء معينه من الجسم ، وخصوصا الاطراف | وبالتالي ده هيأثر جدا علي التآم الجرح ويخليه ياخد فتره اطول علي مايلتآم ، واكتر عرضه لنمو البكتريا.
⬅️السبب التاني أن مستوي السكر لما بيزيد بيضعف الاعصاب ودا عن طريق انه بيضعف الأوعية الدمويه | وبالتالي ده هيأثر علي الاحساس ، وعلشان كده ، ممكن يحصل جرح ومتحسش بيه ، كمان لما الاعصاب بتضعف بتاثر علي كميه العرق وبتكون قليله جدا وده بيخلي الجلد جاف وبيكون عرضه للتشقق والجرح بسهوله.
طيب ايه المضاعافات اللي ممكن تحصل لمرضي السكر
١- بتر اصبع او قدم أو طرف ودا بسبب ان الدم والاكسجين مبيوصلوش للاطراف بكميه كافيه وبالتالي الخلايا هتموت ويحصل غرغرينه للعضو وهيحتاج للبتر.
٢- التهاب المسالك البوليه وده لان الاعصاب لو اتعرضت للتلف البكتريا هتتراكم في المنطقه دي ويحصل التهاب وكمان نتيجه لتلف الأعصاب المريض بيفقد الاحساس بالقدره علي التبول وده هيؤدي للتبول اللإرادي و سلس البول.
٣- تلف المفاصل وبالتالي ده هياثر علي الحركه بس لو لحقناه في الاول ممكن نعالجه بسهوله.
⬅️طيب لو لا قدر الله حصل جرح لمريض سكر
ازاي اتعامل معاه ؟!!!
١- اول حاجه تغسل الجرح بالميه والصابون وتزيل اي شوائب بحرص
٢-بعد كدا تعقم الجرح باستخدام بيتادين ومحلول الملح
٣- وتغطي الجرح بالشاش
٤- وتغير علي الجرح مرتين في الاسبوع
٥- وممكن نستخدم اشعه الليزر لانها بتساعد علي التآم الجروح
٦-و لو كان الجرح دا بسبب مسمار لازم تزور الطبيب عشان يقيم الحاله ويدي حقنه تيتانوس والمضادات الحيويه المناسبه لحاله المريض.
⬅️ " ازاي بقا نقدر نتجنب كل دا "
١- التحكم في السكر عن طريق قياس السكر بشكل مستمر ، واخد الدواء بانتظام بحيث إن مستوي السكر ، يفضل طبيعي.
٢- العنايه بالطراف اليدين والقدمين عن طريق غسلهم باستمرار | وناخد في الاعتبار اننا مننقعهمش في الميه لفتره طويله علشان الرطوبه.
٣- فحص اليدين والقدمين باستمرار علشان لو حصل جرح ومحستش بيه نلحق نعالجه قبل حدوث مضاعفات.
٤- استخدام المرطبات باستمرار ولكن ممنوع استخدمها بين الاصابع بكميات كبيره علشان ميحصلش نمو للبكتيريا ويحصل عدوي.
٥- المحافظه علي الوزن عن طريق تقليل الدهون والمحافظه علي نسبه الكوليسترول في الدم.
يجب عليك تسجيل الدخول لتستطيع كتابة تعليق