مأساتى ( قصه واقعيه )

- حضرتك من يوم ما جيتى الشركة ونفسك تسألينى مالك عنيكى مليانه حزن ليه حتى وانت بتضحكى برضه زعلانه … حضرتك زى والدتى وأنا باحترمك واقدرك علشان كده هاحكى لك ،،، قبل ما أجى الشركة كنت متزوجة وعندى ولدين باباهم فى يوم أخدهم فسحهم وكان راجع على الطريق الدائرى وفجأة العربية اتقلبت وحياتى كلها اتقبلت معاها ولادى توفوا فورا وزوجى اتنقل المستشفى كنت مش عارفه أعمل إيه .

أروح أطمن على زوجى فى المستشفى والا ألحق أودع ولادى واسلم عليهم فى المشرحه ،،، جريت على المستشفى لقيت جوزى فى غيبوبة رحت المشرحه محدش رضي يدخلنى اشوف ولادى ، أخويا خلص الاجراءات ووكيل النيابة طلبنى وسألنى تتهمى حد فى التسبب فى الحادث أنا قلت لأ دى عربية واتقلبت قضاء ربنا وقدره هاعترض على إيه ،،، محامى لقيته فى النيابة طلب منى اعمل له توكيل واتهم شركة العربيات ان عيب فى عربيتهم هو السبب فى الحادث  .

وأخد تعويض لكن رفضت ،مفيش فلوس ممكن تعوضنى عن أولادى ،،، جوزى فضل فى العناية المركزة شهر وبعدين توفى الله يرحمهم جميعا رحت النيابة تانى علشان أخلص نفس الإجراءات فوجئت بوكيل النيابة يقول لى ان الشرطة قبضت على عصابه بتتعمد تحط طوب على الطريق بالليل علشان العربيات تتقلب وياخدوا التليفونات والفلوس بتاعت الضحايا ،، اتصدمت وسكت مكنتش عارفه أقول إيه ولا أعمل إيه .

يعنى علشان موبايل وفلوس جوزى وولادى الاتنين ماتوا ، بعد مراجعة الكاميرات وجهت لهم النيابة تهمة القتل الخطأ وأنا وكلت محامى يطلب أقصي عقوبه للمجرمين القتله ، يوم المحاكمة كان يوم صعب دخلت القاعه أدور فى وشوش المتهمين يا ترى مين فيهم اللى قتل زوجى واولادى مين منهم اللى قتل فرحتى وخلانى كبرت مية سنه فجأه مين فيهم اللى طعنى فى قلبي من غير سكين ويا ترى عنده أولاد عنده زوجه يعنى لو راحوا منه هيحس بالنار اللى أنا فيها  .

لما بدأت الجلسه وبدأوا ينادوا على المتهمين عرفتهم مكنتش قادره أعمل حاجه صوتى اتخنق جوايا اتمنيت لو كان معايا مسدس كنت قتلتهم ، كانوا تلاته واكتشفت انهم تسببوا فى 5 حوادث ، بعد جلسات ومرافعات اتحكم عليهم ب5 سنين تخيلى خمس سنين بس .